Gindagdagan sang gag order ang duha ka spokespersons sang National Task Force to End Local Communist Armed Conflict (NTF-ELCAC) agud nga mauntat ang ila nga mga pahayag may kaangtanan sa community pantries.
Suno kay National Security Adviser Hermogenes Esperon, Jr. nga nagaserbe man nga vice chair sang NTF-ELCAC, ginapahipos na sa isyu sa community pantries sanday Lt. General Antonio Parlade Jr. kag Communications Undersecretary Lorraine Badoy.
Ang gin-isyu nga gag order ang kasunod ang kontrobersyal nga ‘pagpang-red tag’ sang duha ka nasambit nga opisyal sa mga community pantries sang nagligad nga semana.
Kun matandaan, ginpaanggid ni Parlade ang mga inisyatibo sang Maginhawa community pantry organizer sa Quezon City nga si Ana Patricia Non kay Satanas nga amo ang naghatag sang mansanas kay Eva.
Si Badoy naman ang nag-akusar kay Non bilang myembro sang underground mass organization nga Artista at Manunulat ng Sambayanan (ARMAS).
May kaangtanan diri, gin-athag ni Esperon nga kaangay sang bilog nga gobyerno, gina-obserbaran man, ginasuportahan, kag gin-assist sang NTC-ELCAC ang mga community pantries nga amo ang nagapakita sang bayanihan spirit sa tunga sang COVID-19 pandemic.
Una diri, pila na ka mga senador ang nagpanawan nga kakason si Parlade sa NTF-ELCAC kag kuhaan sang budget ini nga ahensya nga ginapamunuan ni Presidente Rodrigo Duterte.
