Ginkumpirma sang self-confessed former rebel nga si Jeffrey Celiz ukon Ka Eric Almendras nga ang mga posters nga may pangalan kag pictures sang pila ka mga lider sang progresibo nga grupo nga nagalapta sa syudad sang Iloilo ang upod nila sadto sa hublag protesta.
Yari ang mga pangalan nga napagkit sa poster sa diin nakabutang man nga kwalipikado ang mga ini sa programa sang gobyerno nga Enhanced Comprehensive Local Integration Program (E-CLIP):
-aktibista nga si Lean Porquia
-Bryan Bosque sang BAYAN Muna-Panay
-Teofisto Mellizza sang National Union of Peoples Lawyers (NUPL) nga amo ang ginapahayag abogado sang NPA
-Lucy Francisco sang GABRIELA-Panay
-Irish Inoceto sang GABRIELA-Panay
-Maura Abellon sang KADAMAY-Panay
Sa interview sang Bombo Radyo kay Celiz, iya ginpahayag nga maayo man ang intensyon sang mga tawo nga nagapalapta sang amo nga posters nga ginabulgar ang pangalan sang pila ka mga pinuno sang ginapahayag rebelde nga grupo.
Suno kay Celiz, nagakadapat nga mag-untat na ang mga ini sa pagpakuno-kuno nga indi sila kabahin sang terorista nga grupo.
Pahayag ni Celiz, pinaagi sa programa sang gobyerno nga E-CLIP, mabuligan ang ginapahayag mga lider kag mga myembro sang CPP-NPA-NDF kag Militia ng Bayan nga luyag magbalik sa gobyerno kag makaupod sa liwat ang ila nga pamilya.
Magluwas diri, mahatagan sila sang nanuhay-tuhay nga bulig kag mauntat na ang madugo nga mga engkwentro sa tunga sang gobyerno kag rebelde nga grupo.
Santo sa Adiministrative Order No. 10 nga ginpirmahan ni Presidente Rodrigo Duterte, ang E-CLIP ang para sa mga masunod:
- Regular nga myembro sang CPP-NPA-NDF;
- Ila asawa, anak, kag kaupod nga legitimate ukon illegitimate lakip na ang ila nga ginikinan kag utod; kag
- Mga myembro sang Militia ng Bayan
Samtang, sa pihak sini, ginpanginwala naman ni Celiz nga sila ang nagapalapta sang posters sang mga ginapahayag mga myembro sang rebelde nga grupo.
Sa ngalan sang patas nga pagwaragwag, bukas ang Bombo Radyo Iloilo sa pahayag sang nadalahig nga mga pangalan.
