Hugot ang pagpati sang national vice-chairman sang Gabriela Women’s Party nga ang mga sa likod sang nagapalapta sang posters nila sa Iloilo City amo ang National Task Force to End Local Communist Armed Conflict (NTF-ELCAC).
Sa interview sang Bombo Radyo kay Lucy Francisco sang GABRIELA-Panay, iya ginpahayag nga ginakondenar nila ang lihok sang NTF-ELCAC sa pagpalapta sang ila posters.
Nagapati si Francisco nga bangud man ini sa ila pagtukod sang community pantry nga ginapilahan man sang kubos nga pumuluyo.
Suno kay Francisco, pagpang-red-tag ang ginaobra sang NTF-ELCAC sa ila.
Nagakadapat man suno sa iya nga mauntat na ini bangud ang mayor nga katuyuan niya sa pagtukod sang community pantry amo ang makabulig sa isig-katawo.
Pahayag sang natungdan, maathag nga may kapaslawan ang gobyerno sa COVID-19 response kag ang mga tawo nga may inisyatibo sa pagbuligay sa tunga sang nagapadayon nga pandemya ang indi na kuntani masubject sa pagpangprofile.
