Apat ang arestado sa ginpatigayon nga entrapment operation sang Criminal Investigation and Detection Group (CIDG) Region 6 sa Brgy. Airport, Megaworld, Mandurriao, Iloilo City.
Ang arestado amo sanday Norberto Oñas, 63; Edgar Oñas, 61, lunsay residente sang Brgy. Sta. Ana Estancia, Iloilo; Gil Cuñada, 63; kag Marybeth Gadia, 37, residente sang Brgy. Camambogan, Balasan iloilo.
Sa exclusive interview sang Bombo Radyo kay PMaj. Jess Baylon, pinuno sang CIDG-Iloilo City Field Unit, iya ginpahayag nga masobra isa ka bulan nila nga ginamonitor ang apat ka arestado matapos nagpasa sang reklamo ang tag-iya sang duta.
Ang amo nga duta ang iligal nga ginabaligya sang mga arestado sa balor nga P33 Million.
Suno kay Baylon, matapos nila ginpatigayon ang entrapment operation pinaagi sa pag-akto bilang buyer kag abogado, nakuha sa mga arestado ang mga masunod:
- Acknowledgement receipt nga pirmado ni Edgar Oñas, Norberto Oñas, Marybeth Gadia kag Atty. Gil Cuñada;
- Proposal para sa residential lot;
- Proposal para sa commercial lot;
- (P 200,000) nga ginpatungan sang (6) one thousand peso;
- (1) bundle boodle money nga ginpatungan sang (1) thousand peso sa balor nga (Php 500,000.00);
- (1) bundle boodle money nga ginpatungan sang (1) thousand peso thousand peso sa balor nga (Php 500,000.00);
- (P 4,000,000) boodle money nga ginpatungan sang (5) one thousand peso; kag
- Nagakalain-lain nga mga dokumento
Ang mga arestado ang gindala na sa CIDG-Iloilo City Field Unit kag nagapangatubang sang kaso nga estafa.
