Ginaduso sang pamunuan sang Iloilo City Police Office (ICPO) ang ‘Guya ko, Ipakita ko’ sa Iloilo City Council.
Ini amo ang proposal sang ICPO nga ginpasa na sa committee on Police Matters sa Sangguniang Panlungsod agud himuon nga layi ang pagpabutang sang stickers sa helmet sang tanan nga motrorista sa syudad sang Iloilo.
Sa interview sang Bombo Radyo kay Iloilo City Police Office (ICPO) Director PCol. Uldarico Garbanzos, iya ginpahayag nga mas epektibo ang ila pagtul-id kag pagtumod sang mga suspek sa riding-in-tandem incidents kun mangin ordinansa ang ila ginpasa nga proposal.
Suno kay Garbanzos, katuyuan sini nga antes magsulod ang isa ka motorista sa mga establisimento komersyal, icapture anay ang ila itsura sa camera bag-o ang temperature check kag disinfection.
Ginpahayag sang natungdan nga ang registration naman sa pagpabutang sang number kag sticker sa helmet ang patigayunon sa kada barangay.
Samtang, patigayunon na sa Byernes, Abril 30 ang committee hearing sa Iloilo City Council kaupod ang ICPO, stakeholders kag pila ka mga motorista sa syudad sang Iloilo.
Sa interview sang Bombo Radyo kay Iloilo City Councilor Carlos ‘Jojo’ Javellana nga amo ang chairman sang committee on Police Matters kag Peace and Order sa konseho, iya ginpahayag nga sa ila committee hearing, diri kag diskusyunan ang proposal sang ICPO natuhoy sa pagpabutang sang sticker sa mga helmet sang motorista.
Suno kay Javellana, kwestyunon niya kun sa diin magahalin ang mangin budget para sa pagparehistro sang motorista agud makakuha sang numero nga ibutang bilang sticker sa helmet.
Gin-ako sang natungdan nga madamo sang indi pa maathag sa iya sa diin mabudlay para sa mga motorista ang ginaduso sang ICPO bangud sa posible dugang nga magasto ilabi na nga madamo sang pigado subong sa tunga sang COVID-19 pandemic.
