ILOILO CITY- Wala na sang kabuhi ang mag-asawa sang nasapwan sa ugsaran sang ila puluy-an sa Brgy. Batuan, Pototan, Iloilo.
Ang mga biktima amo sanday Sherwin Ticzon, 43 anyos kag Christy Ticzon, 39 anyos, lunsay empleyado sang ILECO 2,sa diin cashier ang babaye sa opisina sa Passi City kag driver naman ang lalaki nga assigned sa Pototan.
Sa interview sang Bombo Radyo kay PSSgt. Amando Caporal, imbestigador sang Pototan Municipal Police Station, iya ginpahayag nga posible nga kagab-i pa sang napatay ang mga biktima base sa ila itsura.
Suno kay Caporal, wala sang pilas ang mga biktima nga posible gintunaan sang ila kamatayon magluwas lang sa pilas sa abaga sang babaye nga biktima nga posible gintuga sang pagkaigo sa cyclone wire sang natumba ini.
Ginpahayag man sang imbestigador nga wala man sang may nabatian nga makaduluda nga gahod ang mga kaingod-balay sang mga biktima antes sila napatay.
Natalana naman nga ipaidalom sa autopsy ang mga biktima agud matumod ang matuod nga gintunaan sang ila kamatayon.
Suno naman kay Aljohn Ticzon, utod sang lalaki nga biktima, kon ginpatay gid man ang mga biktima, posible nga personal ang motibo ukon mahimo man nga may kahilabtanan sa ila trabaho sa ILECO bangud nga kabahin sang trabaho ni Sherwin Ticzon amo ang pagdisconnect sa mga linya sang kuryente sang mga konsumidor nga wala nakabayad sang electric bill.
