Ginaduso sang Sangguniang Panlungsod ang pag-amyendar sa ordinansa sang national government natuhoy sa mandatory nga pagsuksok sang face mask sa syudad sang Iloilo.
Sa interview sang Bombo Radyo kay Iloilo City Councilor Ely Estante, iya ginpahayag nga sa idalom sang ordinansa sang Iloilo City Government nga Regulation Ordinance no. 2020-085 (an Ordinance amending the penalties of Regulation Ordinance no. 2020-061), nasaad nga pinahan lamang ang wala nagasuksok sang face mask.
Apang kun indi makabayad ang mga madakpan, nagakadapat nga magrender ang mga ini sang community service.
Suno kay Estante, mas istrikto naman ang pagsulundan nga ginduso sang national government sa diin nasaad sa Republic Act 11332 ukon “Law on Reporting of Communicable Diseases”, nga ginadumilian ang indi pag-kooperar sang pasyente ukon indibidwal sa health protocols sa diin ang penalidad ang nagalab-ot sa P20,000 tubtob sa P50,000 kag posible man nga ma-preso sa sulod sang isa tubtob anum ka bulan.
Ginpahayag sang konsehal nga bangud sini, ang mga magalapas sa amo nga layi kag mapreso ang makaangkon sang record nga criminal offense.
Bangud sini suno kay Estante, katuyuan nila sa Sangguniang Panlungsod nga maghimo sang pila ka amendments agud indi matam-an sa penalidad kag malikawan ang pagkapreso sang mga pumuluyo sang syudad nga madakpan.
Ini bangud suno sa natungdan tuman na man kasiot ang sitwasyon subong bangud sa COVID-19 pandemic.
Samtang, yari ang mga wala nalakip sa pagapinahan kag pagapresuhon sa tion nga madakpan sang otoridad nga wala nagasuksok sang facemask ukon wala ini ginasuksok sang insakto sa syudad sang Iloilo nga nasaad sa amendments nga ginaduso sang Sangguniang Panlungsod:
- Mga menor nga nagaedad 10 ka-tuig panubo nga amo ginakabig kabahin sang vulnerable nga sektor;
- Mga indibidwal nga psychosocial ukon may yara sang physical kag mental illness;
- Mga tawo nga nagapakigbahin sa high intensity activities kaangay sang biking, running, kag swimming apang nagakadapat magtuman sang iban pa nga minimum health protocol kaangay sang physical distancing;
- Mga nagadine-in sa mga retaurant apang nagakadapat nga isuksok liwat ang face mask matapos magkaon;
- Mga indibidwal nga yara sa sulod sang ila pribado nga salakyan kaupod ang pamilya; kag
- Mga tawo nga may underlying conditions ukon nagkalain-lain nga balatian;
Matandaan nga una na ginpahayag ni Department of Interior and Local Government (DILG) Sec. Eduardo Año nga masobra 18,000 ka tawo sa bilog nga Pilipinas ang naaresto sang mga pulis nga nagalapas sa health protocol sa diin kadam-an diri ang wala nagasuksok sang face mask.
