ILOILO CITY – Wala pa nakabaton sang kompleto nga marching order ang pamunuan sang Iloilo City Police Office (ICPO) nagikan sa Philippine National Police natuhoy sa penalidad nga ihatag sa mga madakpan nga wala nagasuksok sang face mask sa syudad sang Iloilo.
Sa interview sang Bombo Radyo kay Police Colonel Uldarico Garbanzos, director sang ICPO, iya ginpahayag nga sundon lamang anay sang syudad ang local ordinance sang Iloilo City Government may kaangtanan sa penalty nga ihatag sa mga madakpan nga wala nagasuksok sang face mask.
Suno kay Garbanzos, sa Regulation Ordinance no. 2020-085 (an Ordinance amending the penalties of Regulation Ordinance no. 2020-061), nasaad nga pinahan lamang ang wala nagasuksok sang face mask kag paubrahon sang community service ang indi makasarang magbayad sang fine.
Nagapati man ang natungdan nga indi ini ang insakto nga tion agud mapreso ang isa ka tawo kag magabayad tubtob P50,000 sa tion nga madakpan nga wala nagasuksok sang face mask santo sa ordinansa sang national government.
Nahibaluan nga sa idalom sang Republic Act 11332 ukon “Law on Reporting of Communicable Diseases”, nasaad nga ang mga wala nagakooperar nga indibidwal sa health protocols, hatagan sang penalidad nga nagalab-ot sa P20,000 tubtob sa P50,000 kag posible man nga ma-preso sa sulod sang isa tubtob anum ka bulan.
Matandaan man nga una na ginmanduan ni Presidente Rodrigo Duterte ang mga kapulisan nga dakpon ang mga COVID-19 face mask violators.
