Wala nagsanto ang imbestigasyon sang Police Regional Office (PRO) VI kag National Police Commission (NAPOLCOM) may kaangtanan sa pulis nga hubog kag nagpalupok sang pusil sa kaangay man nga mga pulis sang Mayo 4 sa Pandan, Antique.
Ang pulis amo si Police Staff Sergeant Jhune Alvarez, court process officer sa Pandan, Antique kag nagapangatubang subong sang kaso-kriminal bangud sang illegal discharge of firearms.
Sa una nga nagwa nga impormasyon, online bulang ang ginhalinan sang pagka-impito ni Alvarez kag mahinay nga internet connection.
Apang ginpahayag ni Police Col. Gordy Angihan, ang chief sang Provincial Internal Affairs Service sa interview sang Bombo Radyo nga online Mobile Legends (ML) ang rason sang pagkainit sang ulo ni Alvarez.
Samtang, ginkumpirma naman ni NAPOLCOM Region 6 Director Atty. Joseph Celis nga E-sabong ukon online bulang kag indi ML ang ginahampang ni Police Staff Sergeant Alvarez sang nag-init ang ulo sini kag nagpalupok sang pusil sa kaangay man nga mga pulis.
Sa interview sang Bombo Radyo kay Police Brigadier General Rolando Miranda, director sang PRO VI, iya ginpahayag nga ginarespeto niya ang imbestigasyon sang NAPOLCOM.
Suno kay Miranda, ang ila lamang ginatutukan subong, amo ang kun nalapas ni Alvarez ang police operational procedure, ethical standard, kag norms sang rules and regulations sang Philippine National Police (PNP).
Ginpahayag ni Miranda nga indi na nila pagpahilabtan kun ano ang matuod nga gintunaan sang pagka-impito sang pulis.
Ini bangud mas importante suno sa natungdan nga matul-id ang matuod nga kapaslawan ni Alvarez kag mahatagan ini sang nagakaigo nga penalidad.
