Nagapati ang Iloilo City Police Office (ICPO) nga ‘work related’ ukon may kaangtanan sa trabaho ang motibo sa kontrobersyal nga pagluthang-patay sa 42 anyos nga si Glen Peremne sa Zone 4 Barangay San Juan, Molo, Iloilo City.
Si Glen amo ang utod ni Jail Senior Supt. Gilbert Peremne, Assistant Regional Director for Administration sang Bureau of Jail Management and Penology Region 6 nga nagtaliwan man bangud sa cardiac arrest matapos ang natabo nga pagpatay sa iya utod kag sa ulihi nagpositibo sa COVID-19.
Sa interview sang Bombo Radyo kay Pol Lt. Col. Reuben Siason, Deputy City Director for Operations sang ICPO, iya ginpahayag nga may mga pangalan na sila sang suspek.
Ini ang santo sa pahayag sang mga witness apang indi pa nila mapalayag bangud sa ila nagapadayon nga imbestigasyon.
Suno kay Siason, nakuhaan naman nila sang inisyal nga affidavit ang pamilya sang biktima nga makabulig man pabaskog sa ila nga imbestigasyon.
Ginpahayag sang pulis nga apisar yara na sa 65 tubtob 70 percent ang pagsolbar sang kaso ni Peremne, ginatinguhaan nila sa gihapon nga makakuha pa sang dugang nga mga ebidensya.
