Ginbaliskad ni anay Senate President Juan Ponce Enrile ang iya pahayag nga ginhimo pila na ka dekada ang nagligad tuhoy sa Mutual Defense Treaty sang Pilipinas kag Estados Unidos.
Suno kay retired Supreme Court Associate Justice Antonio Carpio, sang tuig 1992 ginpahayag ni Enrile nga ang memo sang 1973 ni US Seretary of State Cyruz Vance Jr. ang nagakahulugan nga ang Mutual Defense Treaty ang mahimo ma-apply sa West Philippine Sea kun sa diin nahamtang ang exclusive exonomic zone sang pungsod.
Apang nagbaylo sang pahayag ang anay senate president sang nakig-istorya ini kay Presidente Rodrigo Duterte sa diin iya naman ginpahayag nga ang Mutual Defense Treaty ang nagasakop lamang sang Pacific theater kag wala naga-apply sa West Philippine Sea.
Pahayag ni Enrile sa briefing kaupod ang presidente, napaslawan ang Estados Uniods nga pwersahon ang China nga sundon ang agreement nga gin-negosyar sang 2012 agud nga mahagan-hagan ang tensyon sa Scarborough Shoal sa tunga sang Philippine Navy vessel kag pila ka mga Chinese ships.
Apang sang naglakat ang Philippine forces, nagpabilin ang Chinese sa lugar.
Ginkontra man ni detained Senator Leila De Lima ang bag-o nga pahayag ni Enrile kag suno sa iya, ang treaty ang mahimo maapply sa pagpang-atake sa West Philippine Sea kag indi lamang sa Pacific.
Si De Lima ang ang anay tiglikom sang Department of Justice sa idalom sang administrasyon ni anay Presidente Benigno Aquino III.
Gintuad man ni anay senate president Enrile sa briefing nga madamo ang madula sa Pilipinas kun padayunon pa ang pagpakig-away sa China may kaangtanan sa ginaagawan nga West Philippine Sea.
