ILOILO CITY- Wala naistoryahan ang politika sa pagpakigsugilanon sang mga Garin partikular na ni Guimbal Mayor Oscar Garin kay Iloilo Provincial Administrator Atty. Suzette Mamon.
Sa interview sang Bombo Radyo kay Mamon, iya ginpahayag nga lunsay mga proyekto lang sa Guimbal ang ginpangayuan sang update ni Garin.
Suno kay Mamon, nagalakip ini sang mga proyekto ni Garin angot sa school board sa Guimbal kag ang mga gina-request nga streetlight sang mga barangay.
Ginpahayag man sang provincial administrator nga apisar wala man naistoryahan ang pulitika, wala man siya sa gihapon sa posisyon para magdesisyon tuhoy diri.
Nahibaluan nga una na nga naghatag sang commitment of support kay anay Iloilo 4th District Representative Ferj Biron sanday Iloilo 3rd District Representative Michael Gorriceta kag 5th District Representative Raul ‘Buboy’ Tupas sa tion nga magpadalagan ini sa pagka-gobernador, apang kon indi magpadalagan si Biron, si Iloilo Governor Arthur Defensor Jr. ang suportahan nanday Tupas kag Gorriceta.
Ginabantayan naman ang mangin masunod nga tikang sa pulitika sang mga Garin.
