Ginkumpirma sang State-run lender nga Land Bank of the Philippines nga nakapagwa na sila sang kabug-usan nga P7.5 billion nga loan kag grants sa kapin 1 million ka mga mangunguma humalin sang ginpapag-on ang Rice Tariffication Law (RTL) ukon Republic Act No. 11203.
Suno sa Landbank, ang total loans kag cash grants nga nahatag as of April 30, 2021 ang nakabenepisyo na sa 962,126 ka mga mangunguma.
Ang state-run bank ang nagapatigayon sang support programs para sa Department of Agriculture bilang kabahin sang pagpatuman sang RTL implementation agud mabuligan ang mga lokal nga mangunguma nga magdamo ang ila produkto kag magtaas ang income.
Sa P7.5 billion nga gindisburse as of April 30, 2021, P1.03 billion ang cumulative loans nga nahatag sa 6,218 ka mga eligible borrowers sa idalom sang Expanded Rice Credit Assistance under the Rice Competitiveness Enhancement Fund (ERCA-RCEF).
Tubtub sa tuig 2024, ang Landbank ang magapahulam sang P500 million na credit assistance kada tuig sa idalom sang ERCA-RCEF sa mga mangunguma sa 38 ka mga rice-producing provinces sa kasarangan nga interest rates kag minimum documentary requirements.
Nakapahulam naman ang Landbank sang P2.52 billion sa 165,963 ka mga small rice farmers pinaagi sa Survival and Recovery Assistance (SURE Aid) Lending Program.
Sa ini nga programa, ang kada rice farmers nga may ginatalauma nga isa ka ektarya panubo ang makakuha sang credit assistance nga P15,000 na may zero interest kag wala sang collateral.
Sa idalom naman sang Rice Farmer Financial Assistance (RFFA) Program sang DA, kabug-usan nga P1.27 billion ang nahatag nga cash assistance sa mga mangunguma.
Ang RFFA ang P3-billion unconditional cash transfer program nga nahagatag sang P5,000 nga financial assistance sa kada mangunguma nga nagatalauma sang 0.5 tubtub duha ka ektarya sang duta.
