ILOILO – Suspendido ang mga operasyon sang mga resort sa probinsya sang Iloilo umpisa Mayo 22 nga magalawig tubtob Mayo 31.
Sa Executive Order No. 163 nga ginpirmahan ni Iloilo Governor Arthur Defensor, Jr., nakasaad nga ginadumilian ang operasyon sang facilities sa tourism, recreation, kag accommodation establishments sa probinsya kag amo man ang swimming sa public beaches kag inland water sa amo nga time period.
Sa interview sang Bombo Radyo kay Defensor, iya ginpahayag nga pahanugutan lang ang serbisyo sang sini nga mga establisemento para sa mga Authorized Persons Outside of Their Residences ukon mga APOR, mga returning ukon repatriated Overseas Filipino Workers (OFWs) kag iban pa nga overseas Filipinos (OFs) nga nagabalik sa ila nga mga lugar, kag iban pa nga returning residents.
Ginlimitahan man sa 50% ang seating capacity sa dine-in service sa restaurants, fast food chains, kag food stalls.
Ang bag-o nga pagsulundan ang kabahin sang tikang sang probinsya agud malikawan ang pagtilipon sang tawo kag paglapta sang virus.
