Pito ka mga COVID-19 active cases ang narekord sa Barangay Q. Abeto-Mirasol, Mandurriao, Iloilo City.
Sa interview sang Bombo Radyo kay Punong Barangay Ramon Amoroso Sr., iya ginpahayag nga ang pito ka mga empleyado ang nagikan sa isa ka construction company sa diin ang “safe house” nga ginatiniran nila ang nahamtang sa nasambit nga barangay.
Gin-athag ni Amoroso nga wala sang residente niya ang nalakip sa mga COVID-19 positives.
Indi lang mapat-od sang punong barangay kun sa diin nakuha sang mga empleyado ang virus bangud masami ang mga ini sa field.
Sa contact tracing, lunsay mga personnel lang sang kompaniya ang na-contact trace kag wala na sang iban nga mga pumuluyo sang Q. Abeto-Mirasol.
Sa subong, nagapabilin na sa quarantine facility ang mga nagpositibo sa virus.
Samtang, nagdangat na sa 140 nga mga residente niya ang nakabaton na sang first dose sang COVID-19 vaccine.
May yara sang 3,713 ka populasyon ang Q.Abeto-Mirasol kag 80% diri ang nakaparehistro na nga handa magpabakuna batuk sa COVID-19.
