Dapat nga magpadayon ang mga Filipino fisherfolk sa pagpangisda sa West Philippine Sea apisar sa pagpatuman sang China sang fishing ban sa lugar.
Ini ang ginpahayag ni Presidential Spokesperson Atty. Harry Roque duha ka adlaw matapos nagprotesta ang pungsod sa fishing ban sang China nga nangin epektibo sang Mayo 1 kag magalawig tubtob Agosto 16.
Una na nga ginpahayag sang Department of Foreign Affairs ng ang fishing moratorium sang Beijing ang indi basehan sa idalom sang international law.
Suno kay Roque, wala sang extraterritorial application ang mga layi sang foreign country gani, may kinamatarong ang mga manugpangisda nga magtinir kag magpangisda sa tradisyonal nga fishing grounds sang pungsod.
Yara man pahayag niya ang Philippine Coast Guard agud proteheran ang interes sang mga manugpangisda.
Nahibaluan nga sang Hunyo 2019, gin-igo sang Chinese fishing vessel ang fishing boat sang mga Pinoy nga Gem-Ver 1 sa Reed Bank, ang area nga sakop pa sang exclusive economic zone sang Pilipinas nga gindaogan sang pungsod sa Permanent Court of Arbitration sang Hulyo 2016.
Ang 22 ka mga crew members sang Gem-Ver 1 ang na-rescue sang Vietnamese fisherfolk nga nakakita sa mga Filipinos lima ka oras matapos nga ginbungguan sang Chinese ang ila nga sakayan pandagat.
