Ginpasigurado ni Philippine National Police (PNP) Chief Gen. Guillermo Eleazar nga paimbestigaran sa Criminal Investigation and Detection Group (CIDG) ang ginapahayag “under the table” ukon pagbaligya sang mga COVID-19 vaccine kag vaccination slots.
Suno kay Eleazar, manabat sa layi ang utok sang nasambit mga modus.
Ang CIDG na suno sa natungdan ang bahala sa pagtumod sa mga indibidwal nga naangot sa nasambit nga scam kag ginpasigurado nga maaresto ang mga ini.
Paathag sang PNP Chief, iligal ang pagbaligya sang COVID-19 vaccine bangud ginhatagan lang ini sang Emergency Use Authorization (EUA) sang Food and Drug Administration.
Ang nasambit nga tikang sang PNP ang kasunod sang viral post sa social media nga nagapakita nga ang mga vaccine slots sa nagkalain-lain nga local government units ang ginabaligya sang pila ka mga “unscrupulous” individuals kag nakadepende pa ang presyo sa brand sang vaccine.
Nagabalor suno sa natungdan sang P10,000 tubtub P15,000 ang vaccination slots.
Nahibaluan nga kadam-an sa mga nag-abot nga bakuna ang donasyon kag ang iban naman ang ginbakal sang gobyerno agud ihatag sang libre sa publiko.
Ginpanugyanan man ni Eleazar ang publiko nga indi magbayad, sa baylo, magregister kag hulaton ang turno ukon insakto nga slot.
Nagpanugyan man sang natungdan sa publiko nga isugid sa PNP kun may mahibaluan nga nagabaligya sang COVID-19 vaccine.
