Makabig nga pagpanglugos apisar sa bibig lamang sang isa ka indibidwal ang ginpenetrate ukon ginpasulod ang kinatawo sang isa ka rapist.
Sa interview sang Bombo Radyo kay Atty. Joenar Pueblo, iya ginpahayag nga ang rape ukon ang pagpanglugos ukon ang Republic Act 8353 ukon Anti-Rape Law of 1997 amo ang pagpakighilawas ukon paghimo sang binastos gamit ang pwersa.
Ang duha ka tawo ukon masobra pa ang posible maghimo sang pagpanglugos sa isa lamang ka indibidwal.
Ang pagpanglugos ang nagakatabo man sa duha ka tawo nga may parehos sang sekswalidad kaangay sang duha ka babaye kag duha man ka lalaki.
Suno kay Atty. Pueblo, mahimo magreklamo ang isa ka indibidwal sang pagpanglugos apisar nagtandog lamang ang kinatawo sang suspek sa kinatawo sang biktima.
Makabig man nga rape ang pwersahan nga pagpasulod sang isa ka butang sa kinatawo sang isa ka indibidwal.
Ginpahayag ni Pueblo nga mahimo man magreklamo sang pagpanglugos ang isa ka lalaki baliskad sa pagpati sang kadam-an nga babaye lamang ang masami nga biktima sini.
Ang mga masunod ang makabig nga rape ukon pagpanglugos:
- Pagpakighilawas nga gingamitan sang pwersa, pagpakulba ukon pagpamahog;
- Ang isa ka indibidwal ang ginakuhaan sang mga rason agud mang-indi sa pagpakighilawas;
- Pagpakighilawas pinaagi sa plano nga pagpang-into ukon may pagpang-abuso ukon pagwaslik sang poder; kag
- Kun ang biktima ang yara sa edad nga 12 anyos panubo
Sa tion nga mapamatud-an ang pagpanglugos, magapangatubang ang suspek sa penalidad nga reclusion perpetua ukon pagkapreso tubtob nagakabuhi.
