ILOILO CITY- Wala pa nakalab-ot sa opisina ni Mayor Bienvenido Margarico sang Janiuay, Iloilo ang reklamo sang isa ka tag-iya sang duta angot sa ginapahayag indi husto nga pagpatigayon sang quarry ukon pagkuha sang mga balas kag bato sa ila lugar sa Brgy. Madong, Janiuay, Iloilo.
Matandaan nga ginpa-Bombo ni Renato Habana, tag-iya sang duta ang ginaalegar quarrying sa iya nasakupan nga duta kag ang ginatudlo nga nagapatigayon sang operasyon amo sanday Elmer Camarista kag Punong Brgy. Tikboy “Tiko” Camarista.
Sa interview sang Bombo Radyo kay Mayor Margarico, iya ginpahayag nga kon nakalab-ot sa iya igtalupangod ang amo nga reklamo, ginpalab-ot na niya ini sa Municipal Environment and Natural Resources Office sang banwa agud mag-uyat sang sitwasyon.
Una na nga nagwangal si Habana bangud Setyembre pa sang nagligad nga tuig siya nagapalab-ot sang reklamo sa opisina sang alkalde ,amo man sa MENRO kag sa Provincial Environment and Natural Resources Office (PENRO), apang wala sa gihapon ginaaktuhan ang iya reklamo.
Nagsabat man si Mr. Joven Baranco, pinuno sang Municipal Environment and Natural Resources Office natuhoy sa nasambit nga isyu sang quarrying kag nagsiling nga sini nga Mayo nila nabaton ang amo nga reklamo.
Suno kay Baranco, makapila naman ka beses nakadtuan sang MENRO ang lugar kag may permiso man sang Iloilo Province ang amo nga quarrying apang ila liwat nga kadtuan ang lugar agud matul-id kun may bayolasyon sanday Camarista.
Sa tion nga mapamatud-an suno sa natungdan nga may bayolasyon, hatagan sang nagakaigo nga penalidad ang mga nagpatigayon sang quarry.
