Nagpanugyan si Iloilo Governor Arthur Defensor Jr. sa mga empleyado nga may trabaho sa syudad sang Iloilo nga magdala sang identification card (ID).
Ini kasunod sang border restriction nga ipatuman sa syudad sa mga probinsya sa Western Visayas.
Sa interview sang Bombo Radyo kay Defensor, iya ginpahayag nga wala pa man sila naka-istoryahanay ni Iloilo City Mayor Jerry Treñas apang indi naman ini kinahanglan pa bangud sa tion nga nagsaka ang quarantine classification sang local government unit, pat-od nga may yara sang limitasyon sa pagbyahe.
Sun sa gobernador, lunsay mga Authorized Persons Outside Residence (APOR) lang ang mahimo makaguwa ukon makasulod sa syudad nga amo ang may mga essential nga trabaho.
Sa bahin naman sang byahe sang barko sa Dumangas Port, magapadayon lang anay ini samtang wala pa sang permiso halin sa Inter-Agency Task Force (IATF) nga kanselahon ang byahe.
Magluwas sini, plano naman sang gobernador nga buhinan ang akapsidad sang mga empleyado nga nagatrabaho sa Iloilo Capitol.
Suno kay Defensor, konsulatahon anay niya ang Civil Service Commission sa paglimit sang mga tawo aud nga indi man maggutok ang kapitolyo kag malikawan ang paglapta sang COVID-19.
