ILOILO CITY- Nagapanindugan ang quarry operators sa Brgy. Madong, Janiuay, Iloilo nga wala sang violation sa ginapatigayon nila nga pagkuha sang balas kag bato sa suba sa nasambit nga lugar.
Ini may kaangtanan sa reklamo ni Renato Habana nga ginalabang sang quarry operators nga sanday Jose Elmer Camarista kag Punong Barangay Teodoro Camarista sang Brgy. Tolarucan, Mina, Iloilo ang iya ginapanag-iyahan nga duta sa kilid sang suba.
Sa interview sang Bombo Radyo kay Jose Elmer Camarista, iya ginpahayag nga ang permitted area nga nasaad sa permit nga gin-isyu sang Provincial Environment and Natural Resources Office amo lang ang ila gina-quarry.
Suno kay Camarista, isa ka posible nga rason kon ngaa ginahingabot sila ni Habana kag ginabalabagan ang pagpatigayon sang quarry amo nga mahimo nga mabalahuba ang ginatago sini nga ebidensya sang iya korapsyon sang una.
Ginpahayag ni Camarista nga sang punong barangay pa si Habana sa nasambit nga lugar, may proyekto ini nga hanging bridge nga ginpainan sang budget sang banwa apang napaslawan si Habana nga ipatukod ini.
Suno naman kay Punong Brgy. Isidro Melancio sang Brgy. Madong, Janiuay, Iloilo, base sa ila monitoring, wala man sang may ginlabang nga sakop sang duta ni Habana sanday Camarista.
Ginpahayag pa ni Melancio nga ginarespeto man niya si Habana apang mas maayo nga ipaassess kag ipatakos liwat ang duta nga ginapanag-iyahan ni Habana agud nga mahatagan na sang kasolbaran ang isyu nga nagtuga sang gamo.
