Wala nagustuhan ni Iloilo City Mayor Jerry Treñas ang kontrobersiya nga nagalapta sa social media sa diin nagviral ang post sang pinuno sang compliance team sang Iloilo City Government kasunod sang indi sini pagsunod sa health protocol matapos nagpaidalom sa swab test.
Matandaan nga sa facebook post ni Fernando Jose ‘Boyet’ Rico, iya ginpost ang mga tinaga nga ‘lunch after swabbing’.
Ang amo nga post ang kasunod sang pagpaidalom sa swab test sang mga empleyado sang Iloilo City Hall matapos nagsaka ang COVID-19 cases sa nasambit nga talatapan.
Sa interview sang Bombo Radyo kay Iloilo City Mayor Jerry Treñas, iya ginpahayag nga gina ‘discourage’ niya ang akto sang iya empleyado.
Apang depensa ni Treñas, ang swabbing sang mga empleyado sa Iloilo City Hall ang indi bangud sa contact tracing kundi ini ang para sa mass testing.
Ginpahayag ni Treñas nga bangud kinahanglan sa gihapon magpadayon ang operasyon sang iya opisina sa Iloilo City Hall, nagabalik ang iya mga staff agud magtrabaho.
Bukas naman ang Bombo Radyo sa sabat ni Rico nga amo ang executive assistant ni Iloilo City Mayor Jerry Treñas kaangot sa nasambit nga kontrobersiya.
