Gamiton sang local government unit sang Oton, Iloilo ang pila ka mga hulot sang Oton Central Elementary School para sa mga COVID-19 positives.
Ini bangud nga puno na ang Oton Evacuation Center sa diin ginaakomodar ang mga nagpositibo sa virus.
Sa interview sang Bombo Radyo kay Mr. Jafet Salinas, focal person sang Oton, iya ginpahayag nga may mga expansion na sang quarantine facilities nga ginahimo ang banwa.
Suno kay Salinas, 20 lang ka tawo ang maakomodar sang evacuation center kag may yara na sang 65 ka tawo ang naka-quarantine sa Oton.
Pahayag niya, kun makapasar man ang balay sang isa ka COVID-9 positive sa diin may yara ini sang kaugalingon nga kwarto kag banyo, mahimo man ini nga maka-home quarantine.
Samtang nagpanugyan man si Salinas sa mga taga Oton nga likawan anay mag pa syudad sang Iloilo kun wala man lang sang importante nga transaksyon.
