Naghingyo si Iloilo City Mayor Jerry Treñas sa Inter-Agency Task Force for the Management of Emerging Infectious Diseases (IATF-EID) nga bakunahan na ang tanan nga sektor sa syudad sang Iloilo.
Sa interview sang Bombo Radyo kay Mayor Treñas, iya ginpahayag nga ang halos tanan nga COVID-19 patients sa syudad ang ginabanta nagaedad 20 tubtob 30 anyos nga amo ang kalabanan nagatrabaho para sa tagsa ka pamilya.
Suno kay Treñas, kadam-an man sa COVID-19 positive sa syudad ang nalakip sa economic frontliners.
Bangud sini, nagpangabay man ang Iloilo City Government sa IATF sang dugang nga Reverse transcription polymerase chain reaction (RT-PCR) test kits, personal protective equipment (PPEs) kag dugang nga mga medical personnel.
May kaangtanan naman sa una nga ginhingyo sang syudad nga dugang nga COVID-19 vaccines, maagabot na bwas, Mayo 27, ang dugang nga donasyon sang national government nga 10,000 doses sang Sinovac brand nga mga bakuna.
Samtang, ginpahayag sang alkalde nga ipaiway anay ang COVID-19 vaccination umpisa bwas, Mayo 27 kag padayunon na lamang sa Lunes, Mayo 31.
Ginapreparar naman sang Iloilo City Government ang Iloilo Convention Center agud gamiton bilang isa sa mga vaccination site sang syudad.
