Kalabanan sa mga ginapabalik nga ginakabig indi authorized nga makasulod sa syudad sang Iloilo amo ang mga senior citizens.
Ini ang kadungan sang una nga adlaw sang border control sa Iloilo City matapos ginpaidalom sa Modified Enhanced Community Quarantine Status ang syudad.
Sa interview sang Bombo Radyo kay Police Major Edfel Balibadlan, station commander sang La Paz Police Station nga nag-augment sa quarantine control point sa Tagbak, iya ginpahayag nga kadam-an sa mga senior citizens nga gin-inspeksyon, ang wala ihibalo natuhoy sa ginpatuman nga border restrictions kag wala man sang essential nga katuyuan sa pagsulod sa syudad sang Iloilo.
Suno kay Balibadlan, apisar sini, wala naman sang may nagdinungol pa kag nagsunod man ang kadam-an sa ginapatuman nga checkpoint.
Abiso sang pulis sa publiko, pakamaayuhon nga indi anay maglagaw ukon magwa sa syudad kun indi trabaho ang tinutuyo.
Samtang, nagapasalamat naman ang pamunuan sang Iloilo City Police Office (ICPO) sa kooperasyon kag respeto nga ginpakita sang mga pumuluyo sa pinakauna nga adlaw sang border control sa syudad sang Iloilo.
Sa interview sang Bombo Radyo kay Police Col. Uldarico Garbanzos, director sang ICPO, iya ginpahayag nga apisar mapin-ot ang sitwasyon sa mga quarantine control points bangud sa wala nalikawan nga pagpugok sang trapiko, nangin pasensyoso sa gihapon ang mga tawo kag nagsunod sa mga border enforcers.
Nagpasalig naman si Garbanzos nga mas pasangkaron pa nila ang pagpatuman sang istrikto nga checkpoint kag inspeksyon.
