Ginpalawig pa ang pagpatuman sang liquor ban kag curfew sa syudad sang Iloilo sa Hunyo 30, 2021.
Sa interview sang Bombo Radyo kay Iloilo City Mayor Jerry Treñas, iya ginpahayag nga ini ang kasunod sang padayon nga pagsaka sang COVID-19 cases sa syudad sa diin nakalab-ot na sa masobra 100 ang narekord nga single-day tally sang Iloilo City.
Dako ang posibilidad suno kay Treñas nga padayon pa nga magtimbuok ang kaso sang COVID-19 rason nga palawigon pa sang syudad ang total liquor ban kag curfew sa paglaom nga mapunggan ang pagsurge sang kaso sang virus.
Sa liquor ban, dumilian ang pagbaligya, pagtanyag, pagbakal, pagserbe, kag pagtransport sang makahulubog nga ilimnon kaangay sang whisky, brandy, gin, vodka, rum, cocktail, wine, champagne, beer kag iban pa nga intoxicating drinks.
Sa curfew, dumilian ang paglagaw sang tanan sa mga dalanon umpisa las 10:00 sa gab-i tubtob las 4:00 sang kaagahon magluwas sa mga nagatrabaho sa night shift kag sa mga nagadeliver sang ‘essential goods.
Matandaan nga Mayo 26 sang una nga nagpapanaog sang executive order (EO) si Mayor Treñas sa diin ipatuman ang liquor ban kag curfew tubtob Mayo 31.
Ang mga establisyemento, tyangge kag indibidwal nga magalapas sa EO, ang hatagan sang nagakaigo nga penalidad kag mahimo pasakaan sang kaso.
Ginpahayag sang alkalde nga magasapol man siya sa COVID-19 Team sang Iloilo City Government may kaangtanan sa posiblidad nga palawigon man ang Modified Enhanced Community Quarantine (MECQ) status sang syudad.
Ang padayon nga pagdugang sang COVID-19 cases sa syudad suno kay Treñas amo ang kasunod sang asud-asud nga mass testing kag pagpaidalom sa swab test sang mga close contact.
Samtang, napreparar na sang syudad ang Iloilo Convention Center (ICON) bilang dugang nga vaccination site sa pagpadayon sang COVID-19 vaccination sa Lunes, Mayo 31.
Suno kay Treñas, 1,000 ang natalana nga bakunahan sa Lunes sa Iloilo Convention Center.
Ginpahayag sang alkalde nga ginalauman naman nga mapadasig na ang COVID-19 vaccination sa syudad kasunod sang plano nga dugangan pa ang vaccination sites.
Wala naman suno kay Treñas nagapili ang pumuluyo sa kun ano nga brand sang bakuna nga itublok sa ila.
Nagpanawagan man si Treñas sa mga nurse sa syudad sang Iloilo apisar wala pa nakakuha sang board exam nga mag-apply sa Iloilo City Health Office bangud kulang na ang mga medical personnel sa mga ospital kag iban pa nga facility sa syudad tuga sang nagadugang nga kaso sang COVID-19.
