Nagasinggitan sang hustisya ang pamilya sang isa sa duha ka mga lakaki nga napatay kag gintumod sang Criminal Investigation and Detection Group (CIDG) Region 6 nga mataas nga myembro sang Communist Party of the Philippines-New People’s Army (CPP-NPA).
Ini matapos ang natabo nga engkwentro kasunod sang pagserbe sang search warrant sa isa ka subdivision sa Barangay Balabag, Pavia, Iloilo.
Ang subject sang warrant of arrest amo si Reynaldo Bocala alyas Bading kag ginapahayag myembro sang communist terrorist group.
Samtang, patay man ang kaupod sa balay ni Bocala nga si Willie Arguilles Ipago ukon certain “Ramon” base sa ID nga narecover nga iya sang “Bayan Muna”
Sa interview sang Bombo Radyo kay Marilyn Galgo, utod ni Willie, iya ginpahayag nga mabuot ang batasan sang iya nga magulang.
Suno kay Galgo, ang pinakaulihi nila nga nahibal-an, naga-atipan ang iya magulang sang manok nga ginabulang sang amo sini sa trabaho.
Ginpahayag ni Galgo nga wala man sang armas si Willie sa diin ang masami nga bitbit sini sa iya nga bag, amo ang mga bulong bangud madamo man sang balatian ang iya magulang.
Nakaandan naman nila suno kay Galgo nga wala nagatinir sa ila nga balay si Willie bangud wala man ini sang kaugalingon nga pamilya sa diin masami ini nga nagadayon sa iya mga abyan.
May kaangtanan sa pamangkot kun matuod nga myembro sang terorista nga grupo ang iya nga utod, ginpahayag ni Galgo nga nahibal-an lamang nila nga nagaupod ang iya magulang sa Bayan Muna, sa diin wala man ini nagapanugid kun diin ini nagakadto kag kun ano ang iya mga problema.
Dugang pa niya, kun may kapaslawan ang iya nga magulang sa sosyudad, kuntani ginpiang na lamang ini sa baylo nga ginkuhaan sang kabuhi.
Matandaan nga narekober sa crime scene ang duha ka caliber .45 pistols, Subversive Documents, Empty shells kag mga cellphones.
Una naman nga ginpahayag ni PLt. Col. Gervacio Balmaceda, pinuno sang CIDG Region 6, sa interview sang Bombo Radyo, nga si Bocala, ang kaupod ni Willie nga ginserbehan sang warrant of arrest ang “most wanted person” sa Western Visayas.
