Naka-angkon sang 98 percent ang Region VI sa diin nalakip ang syudad sang Iloilo pag-abot sa COVID-19 vaccine utilization.
Sa interview sang Bombo Radyo kay Iloilo City Mayor Jerry Treñas, iya ginpahayag nga pinakamataas ang naangkon nga rate sang rehiyon pag-abot sa pagpabakuna batok sa COVID-19.
Suno kay Treñas, ini bangud wala untat ang inoculation sang syudad sa diin madasig maubos ang mga bakuna nga gindonar sang National Government.
Apisar sini, nagapasalamat ang alkalde nga may maabot naman nga mga donasyon nga bakuna kasunod sang paghingyo sang syudad.
Ginpahayag ni Treñas nga ginalantaw naman sang syudad ang Ateneo de Iloilo kag University of San Agustin bilang dugang nga mga vaccination site agud mas mapadasig pa ang pagpabakuna sang mga pumuluyo agud mapunggan ang pagdugang sang mga COVID-19 cases.
Nahibaluan nga kadungan sang pagsaka sang COVID-19 cases sa syudad sang Iloilo, ginpalawig pa ang Modified Enhanced Community Quarantine (MECQ) status tubtob sa Hunyo 15.
Samtang, padayon ang panawagan sang Iloilo City Government sa tanan nga mga nurses nga under board, nursing aides, kag utility workers bangud ginakulang ang syudad sang medical personnel para sa mga ospital kag COVID-19 vaccination.
Suno kay Treñas, 132 ka mga nurses, 44 ka nursing aides kag 22 ka utility workers ang kinahanglan sang syudad sang Iloilo.
Ini ang kasunod man sang pagdugang sang syudad sang hospitals beds kag masobra 200 ka mga hulot para sa mga ospital.
Ginpat-od man sang alkalde nga handa ang syudad nga magpangita sang 44 ka nursing aides kag 22 ka utility workers.
