Hugot nga ginapanginwala sang lalaki nga siya ang nagtanyag sang P25 million nga patong sa ulo ni Iloilo City Mayor Jerry Treñas gamit ang iya facebook account.
Mayo 17 sang na-hack ang facebook account ni Arnold Delmoro kag ang pagtanyag nga patyon ang alkalde ang nagguwa subong lamang nga adlaw.
Sa exclusive interview sang Bombo Radyo kay Delmoro, iya ginpahayag nga nagtawag ang bata niya sa iya kag ginpahibalo nga may naggamit sang iya daan nga facebook account.
Suno kay Delmoro, antes pa man ang pagkomento sang hacker, ginpadal-an man sini sang mensahe ang iya abyan nga nagapangayo sang kwarta.
Ginhimo sang hacker ang iya facebook account agud nga i-manipula ang mga tawo sa iya kaugalingon nga bentaha.
Pahayag ni Delmoro, kilalahay sila mismo ni Mayor Treñas kag nakakadto pa ini sa ila balay bangud himata man ini sang iya nga tiayon kag ang anak nila nga duha ang mag-classmates.
Wala na punggan ni Delmoro nga magpaguwa sang kaakig sa hacker bangud nahigko-an ang iya nga pangalan.
Suno sa iya, sa tion nga madakpan ang hacker panigurado nga luputon ini sa sulod sang presuhan bangud subong nagapakig-angot na si Delmoro sa Philippine National Police (PNP) Anti-Cybercrime Group.
Sang gin-trace ang lokasyon sang hacker, natukiban nga yara ini sa Bacolod City apang wala pa sang identity si Delmoro.
Nagpangayo man sang pasaylo si Delmoro kay Mayor Treñas nga nadalahig ang pangalan sini sa kontrobersiya bangud sa mga tawo nga nakakuha sang oportunidad para sa kaugalingon nga bentaha kag personal nga interes sa pihak sang pandemya.
Nagpaandam man siya sa hacker nga ilisipon na lang ang adlaw sini bangud seryoso nga krimen ang iya ginahimo kag ginatugyan na lang ini sa kapulisan.
Kuntani pahayag ni Delmoro, nagpahimuyong na lang ang hacker kag kun kulang man ini sa kwarta, dapat nga mangabudlay siya kag magtrabaho kag indi nga magpanunto.
