Mahimo na nga makabalik sa trabaho subong nga adlaw, Mayo 31 ang mga empleyado sang City Mall sa Passi City nga may negative result sang reverse transcription polymerase chain reaction (RT-PCR) test.
Ini ang kasunod sang pagmandu ni Passi City Mayor Atty. Stephen Palmares nga i-lockdown kag ipaidalom sa swab test ang tanan nga empleyado sang mall sa amo nga syudad matapos nagpositibo ang 24 ka mga empleyado nga nagatrabaho sa grocery store.
Sa interview sang Bombo Radyo kay Mayor Palmares, iya ginpahayag nga nagsaka na sa 48 ang mga empleyado nga COVID-19 positive sa mall.
Suno kay Palmares, kadam-an sa 48 nga empleyado nga nagpositibo sa amo nga virus ang nagarenta sang ila ilistaran.
Bangud diri nagapadayon sa gihapon ang contact tracing sa diin ginpaidalom na sa istrikto nga quarantine ang tanan nga empleyado nga nagpositibo.
Ginpahayag ni Palmares nga natigayon naman nga madisinfect ang bug-os nga mall sa diin nadesignar naman ang nagpositibo sa COVID-19.
Nagapanawagan man ang alkalde sa tanan nga nakasulod sa mall, duha ka adlaw bag-o ini nga ginpaidalom sa lockdown sang Mayo 28, nga magpaidalom sa RT-PCR test agud masigarudo ang seguridad batok sa COVID-19.
Gincontact trace man suno kay Palmares ang mga pumuluyo nga nakasulat sa logbook sang mall.
