Mas madasig nga matapikan sang balatian nga rheumatic fever kag rheumatic heart disease ang mga kabataan nga naga-edad lima tubtob 15 anyos.
Sa interview sang Bombo Radyo kay Dr. James Catoto, Specialist in Internal Medicine – Cardiology sa West Visayas State University Medical Center, iya ginpahayag nga ang rheumatic heart disease amo ang kondisyon sa diin ang valves sang tagipusuon sang tawo ang permanente nga naguba tuga sang rheumatic fever.
Suno kay Dr. Catoto, ang rheumatic heart disease ang ginatunaan sang rheumatic fever nga amo ang isa ka inflammatory nga balatian sa diin maapektuhan sini ang mga nagaalangot-angot nga tisyu sang lawas ilabi na sa tagipusuon, panit, joints kag utok.
Bangud sini, ang valve sa tagipusuon sang tawo ang nagabanog sa diin sa paglawig sang panahon, nagakaguba ini.
Ini ang nagaresulta sa indi normal nga pagfunction sang heart kag nagahulog sa balatian nga heart failure.
May dako man nga risgo nga makaangkon sang balatian nga rheumatic heart disease ang mga kabataan nga indi gilayon madapatan sang pagbulong ang mga inpeksyon sa lawas ilabi na ang strep throat infections.
Ginpahayag ni Catoto nga bangud ang rheumatic fever ang ginahalinan sang rheumatic heart disease, ang pinakamaayo nga treatment diri amo ang likawan ang rheumatic fever pinaagi sa paggamit sang antibiotics agud mapaayo ang trep infections.
