Nagakadapat nga magpakita sang maayo nga paminatasan ang mga public officer ilabi na sa mga frontline services.
Sa interview sang Bombo Radyo kay Atty. Helen Catalbas, anay director sang Department of Tourism (DOT) Region VI, iya ginpahayag nga ang isa ka public officer amo ang mga indibidwal nga gin-appoint sang otoridad, nagdaog sa eleksyon ukon nagatrabaho sa gobyerno.
Suno kay Catalbas, naghimo si Presidente Rodrigo Duterte sang hotline direkta sa Malacañang nga amo ang 8888 sa diin mahimo mapalab-ot ang reklamo batok sa isa ka empleyado kag opisyal sang gobyerno nga wala nagahimo sang insakto nga trabaho.
May tatlo man ka institusyon nga responsable sa pagbaton sang reklamo sang pumuluyo batok sa mga public official ukon empleyado.
Ini amo ang mga masunod:
- Office of the Ombudsman;
- Civil Service Commission; kag
- Office of the Disciplining Authority
Apang ginpahayag ni Catalbas nga nagakadapat mangin rasonable man ang reklamo nga ipasaka ukon ihaboy sa mga public servant kag indi pwede nga magpinagusto na lamang ang pagreklamo.
Gin-ako man ni Catalbas nga sang nagapungko pa siya bilang regional director sang DOT, nakabaton man siya sang reklamo.
Panugyan naman ni Catalbas sa mga public official, dulaon ang pagsinuplada ukon pagsinuplado bangud ang public office amo ang public trust kag ini ang prebilihiyo kag indi kinamatarong.
