ILOILO CITY- Madayon subong nga adlaw ang national council meeting sang Partido Demokratiko Pilipino– Lakas ng Bayan ukon PDP-Laban.
Sa interview sang Bombo Radyo kay Iloilo Governor Arhur Defensor Jr.,miyembro sang partido, iya ginpahayag nga sang nagligad nga semana pa siya nakabaton sang imbitasyon nga pirmado sang party vice chairman nga si Department of Energy Secretary Alfonso Cusi.
Suno kay Defensor, magluwas sa imbitasyon halin kay Cusi, may sulat man nga halin kay Sen. Manny Pacquiao, presidente sang partido, nga nagasiling nga indi pagsapakon ang nasambit nga sulat halin kay Cusi bangod wala ini nag-agi sa husto nga proseso.
Sa pihak sini, ginpahayag sang gobernador nga apisar nga ginbalabagan ni Pacquiao ang amo nga national council meeting, madayon ini sa gihapon bangud nga may basbas halin kay Presidente Duterte nga nagatindog nga chairman sang partido.
May kaangtanan naman sa agenda sang meeting nga patigayunon sa Cebu apang via zoom lang magatambong ang gobernador, ginpahayag niya nga wala siya sang ihibalo apang posible nga politika ang ila mangin topiko.
Matandaan nga ginkwestiyon ni Pacquiao ang pagpatawag ni Cusi sang national council meeting bangud nga wala ini nag-agi sa proseso sa diin nagakadapat nga aprubahan ini sang party president kag party chairman.
