Temporaryo nga ginlockdown ang Government Service Insurance System (GSIS) Iloilo umpisa subong nga adlaw tubtob sa Hunyo 6.
Ini ang kasunod sang pagpositibo sa COVID-19 sang 23 ka mga empleyado.
Sa interview sang Bombo Radyo kay Engr. Mike Arancillo, information officer sang GSIS Iloilo, iya ginpahayag nga katuyuan sini nga mapaidalom ang ila opisina sa disinfection.
Suno kay Arancillo, ginpaidalom na sang istrikto nga quarantine ang 23 ka empleyado nga nagpositibo sa COVID-19 sa diin padayon naman sila nga ginamonitor sang medical and wellness department sang GSIS.
Ang tanan nga natumod nga close contact ang ginpaidalom man sa swab test sa diin ginahulat na lang ang ila nga resulta samtang nakapaidalom sa quarantine.
Nagahimo man sang pila ka pamaagi ang GSIS Iloilo agud indi mag-untat ang ila nga operasyon.
Sa mga may transaction, mahimo makapudulong sa tanan nga drop boxes sang GSIS Iloilo kag mahimo man maka-access sa gsisiloilo@gsis.gov.ph kag sa Facebook page sang GSIS Iloilo.
Nagpangayo man sang paghangop si Arnancillo sa publiko.
