Nagdepensa ang COVID-19 team sang Iloilo City Government kaangot sa liwat nga pagdinaguso sang mga tawo sa Iloilo Convention Center (ICON) kahapon sang aga para sa COVID-19 vaccination.
Base sa mga reklamo nga nabaton sang Bombo Radyo, nagbalik na lang sa ila nga mga balay ang pila ka mga senior citizens bangud sa kalabaon sang pila kag ginapahayag pagginutok sang mga tawo nga wala naorganisa sang maayo.
May yara man sang nagpalab-ot sang impormasyon nga wala nila nabaton ang bakuna santo sa ila scheduled time.
Sa interview sang Bombo Radyo kay Jeck Conlu, spokesperson sang COVID-19 team, iya ginpahayag nga may power interruption nga natabo rason nga kinahanglan pa i-restore ang data bangud apektado ang mga computer.
Suno pa kay Conlu, nasolusyunan man dayon ang delay.
Ang isa pa ka ginbasol ni Conlu kun ngaa naglawig ang pila amo ang mga pumuluyo nga nagpadulong sa ICON bisan nga indi pa nila schedule.
Ini ang una nga vaccination nga gingamit ang ICON gani pat-od man suno kay Conlu nga may himuon nga adjustments agud indi na ini masulit sa sunod nga schedule sang vaccination.
Liwat nga nagpahanumdom si Conlu sa publiko nga ang may ticket lang kag nakapre-register ang mahimo makasunod sa vaccination site — wala sang walk-ins.
Matandaan nga natabo naman ini nga pagdinaguso sang una sa vaccination sa Central Philippine University (CPU) Gym.
Subong nga adlaw, Hunyo 1, amo man ang schedule sa 1st dose inoculation sa ICON kag CPU Gym.
Sa Hunyo 4 amo ang 2nd dose nga pagbakuna sa ICON.
