Magapatigayon sang motu proprio investigation ukon kaugalingon nga imbestigasyon ang Regional Internal Affairs Service (RIAS-6) may kaangtanan sa natabo nga operasyon sang Criminal Investigation and Detection Group (CIDG) Region 6 nga nagresulta sang pagkapatay sang high-ranking member sang Communist Party of the Philippines-New People’s Army (CPP-NPA) matapos ginserbehan sang warrant of arrest sa Barangay Balabag, Pavia, Iloilo sang Mayo 28.
Ang mga napatay amo sanday National Democratic Front of the Philippines (NDF) peace consultant kag finance officer Reynaldo Bocala alyas Ka Bading kag Willie Arguilles Epago ukon Ka Ramon matapos ginapahayag nagbato sa otoridad.
Sa interview sang Bombo Radyo kay Police Col. Roger James Brillantes, Regional Director sang RIAS-6, iya ginpahayag nga basta may yara sang police operation kag shooting incident, diri kag masulod ang RIAS para sa motu proprio investigation ukon automatic investigatation — may complainant man ukon wala.
Gin-abisohan naman sang RIAS ang CIDG nga magpasa sang “after operation/encounter report” agud nga mahibaluan ang tanan nga police personnel nga naangot sa operasyon sang Mayo 28.
Suno kay Brillantes, nakig-angot na sila sa CIDG-Regional Field Unit para sa mga dokumento nga kinahanglanon sa pag-conduct sang motu proprio investigation.
Ang ini nga mga dokumento ang ginalakipan sang after operation/encounter report, request kag resulta sang paraffin examination, kopya sang warrant of arrest kag iban pa.
