Humalin sa kalingawan tubtob nga nakahimo sang adbokasiya kag nakabulig sa local government unit sa pagproteher sa dunang manggad sa idalom sang dagat.
Ini ang katuyuan subong sang Reef Wanderers — ang grupo sang mga scuba divers nga may katuyuan nga i-promote ang diving kag watersport activities bilang pamaagi agud nga mahatagan sang solusyon ang mga issues sa coastal kag marine environments.
Ang bulan sang Mayo ang gindeklara nga Month of the Ocean sa diin ang tema subong nga tuig amo ang “Understand and beat marine pollution.”
Sa interview sang Bombo Radyo kay Cyndy Sol Rodrigo, isa ka biologist kag scuba diver, iya ginpahayag nga madamo kuntani sang nakalinya nga mga aktibidad subong nga bulan kaangay na lang sang pagpaninlo kuntani sa coastal areas sa Carles, Iloilo apang ini ang ginpa-iway anay bangud sa nagataas nga kaso sang COVID-19.
May exhibit man kuntani nga pagahiwaton sa isa ka mall sa syudad sang Iloilo sa Hunyo 8 kadungan sa pagselebrar sang World Ocean Day apang bangud sa modified enhanced community quarantine (MECQ) status sang Iloilo City, ini ang ginpaiway.
Suno kay Rodrigo, leisure lang sadto ang scuba diving para sa iya apang sang nagadugay ang panahon, na-realisar niya nga madamo gali sang problema sa idalom sang dagat.
Diri kag nadesisyonan niya kaupod ang Reef Wanderers nga maghimo sang mga adbokasiya.
Ginpatpat man ni Rodrigo ang mga lugar sa Western Visayas nga manami patigayunan sang scuba diving.
Una diri amo ang sa bahin sang Northern kag Southern Negros Occidental, sa isla sang Boracay kag sa Antique.
