Hugot nga ginpahanumdom sang Barangay Officials sang MH Del Pilar, Jaro, Iloilo City, sa mga pumuluyo nga gilayon nga magpahibalo sa ila nga mga opisyal sa tion nga may nabatyagan nga sintomas sang COVID-19.
Ini ang kasunod sang ginapahayag pagpositibo sa COVID-19 sang isa ka myembro sang isa ka pamilya sang amo nga lugar kag ulihi na nahibaluan sang barangay officials.
Sa interview sang Bombo Radyo kay Punong Barangay Larry Palomo, iya ginpahayag nga ang isa nila ka residente nga nagpositibo sa amo nga virus, nagpaidalum sa swab test sa isa ka pribado nga doktor rason nga wala nila gilayon nga nahibal-an nga may isa sila ka residente nga COVID-19 positive.
Suno kay Palomo, bangud man sini, nadelay ang ila nga pagpatigayon sang contact tracing.
Pangabay sang Punong Barangay sa iya pumuluyo, makig-angot sa ila nga mga opisyal sa tion nga magpaidalom sa swab testing agud mamonitor man nila ini sa tion nga magwa na ang resulta sini.
