Nakalockdown ang pampubliko nga merkado sang Lambunao, Iloilo umpisa Mayo 31 tubtob Hunyo 7.
Ini ang kasunod sang pagsaka sang kaso sang COVID-19 sa amo nga banwa.
Sa interview sang Bombo Radyo kay Lambunao, Iloilo Vice Mayor Arvin Losaria, iya ginpahayag nga makahalangawa na ang kaso sang COVID-19 rason nga ginpasirado anay ang merkado nga amo ang masami nga ginakadtuan sang nagkalain-lain nga tawo.
Suno kay Losaria, may ipahamtang man nga mga kiosk nga mahimo baklan sang mga pumuluyo sang kinahanglanon kag pagkaon.
Ginpahayag ni Losaria nga sa subong, ginabanta nga yara na sa 234 ang mga pasyente sang COVID-19 nga naka quarantine sa ila mga balay kag sa isolation facility.
Nagpanawagan man sang paghangop ang bise-alkalde sa mga pumuluyo sang Lambunao, Iloilo nga mangin mahinalungon kag protektahan ang kaugalingon kag pamilya nga indi matapikan sang COVID-19 pinaagi sa pagsunod sa tanan nga minimum health protocols.
