Nagwa na ang resulta sang water laboratory test nga ginpatigayon sang Bureau of Fisheries and Aquatic Resources (BFAR) sa porsyon sang baybay nga nagpula sa Sitio Luyo, Barangay Poblacion, Carles, Iloilo.
Sa interview sang Bombo Radyo kay Remia Aparri, Director sang BFAR Region VI, iya ginpahayag nga ang pagpula sang tubig sa amo nga lugar ang bangud sa presensya sang plankton nga gintawag nga ‘Peridinium quinquecorne’.
Suno kay Aparri, bangud nagdamo kag nagtaas ang konsentrasyon sang amo nga plankton, didto kag nagpula ang porsyon sang baybay.
Nangin tuman ka paborable man suno kay Aparri ang panahon para magdamo ang plankton ukon microorganism nga nagakabuhi sa tubig kag nagtuga sang pagpula sa porsyon sang baybay.
Ginpahayag ni Aparri nga ang plankton sa tubig ang nagakadula man sa sulod sang indi magsobra sa isa ka adlaw kag samtang yara pa ang presensya sini sa tubig, mas maayo nga dumilian lamang ang pagpanginhas, pagpangisda, kag pagpaligo sa apektado nga porsyon sang baybay.
