Naghingyo ang syudad sang Iloilo sa Inter-Agency Task Force on Emerging Infectious Diseases (IATF-EID) nga ipabilin ang travel moratorium ukon ang temporaryo nga pagdumili sang byahe sang tanan nga mga sakayang pandagat via Iloilo City – Bacolod City kag Iloilo City – Negros Island and vice versa.
Ini ang ginalakipan sang fastcraft kag Roll On Roll- Off (RORO) vessel.
Sa interview sang Bombo Radyo kay Iloilo City Mayor Jerry Treñas, iya ginpahayag nga ‘logic’ na ina kuntani nga kun indi parehas ang quarantine classification sang kada lugar, indi pagpahanugutan ang pakadto kag pabalik sang mga tawo.
Matandaan nga gin-aprubahan ni Presidente Rodrigo Duterte ang pagpalawig tubtob sa Hunyo 15 sang Modified Enhanced Community Quarantine (MECQ) status sang syudad sang Iloilo.
Suno kay Treñas, luyag sang syudad nga essential travelers lamang ang pahanugutan nga makabyahe samtang napaidalom sa MECQ status ang syudad sang Iloilo.
Nahibaluan nga nagpapanaog si Mayor Treñas sang bag-o nga executive order nga nagamando sang temporaryo nga pagdumili sang tanan nga byahe sang tanan nga mga sakayang pandagat via Iloilo City – Bacolod City kag Iloilo City – Negros Island and vice versa samtang napaidalom ang syudad sa MECQ.
Samtang, nagapati naman ang Regional Task Force (RTF) nga indi pa mapatuman ang mando ni Iloilo City Mayor Jerry Treñas may kaangtanan sa travel moratorium samtang wala pa ini naaprubahan sang National IATF.
Sa interview sang Bombo Radyo kay Cindy Ferrer, spokesperson sang Regional Task Force, iya ginpahayag nga gin-endorso naman nila ang hingyo ni Mayor Treñas sa National IATF pinaagi sa pagpagwa sang joint resolution number 11.
Gin-athag ni Ferrer nga bangud sa indi manami nga panahon may yara sang mga pagsuspende sang mga byahe sang fastcraft kag Roll On Roll- Off (RORO) vessel.
Apang suno kay Ferrer, nagbalik man gilayon ang mga byahe sang nagkalma na ang panahon.
Sa subong, ginahulat nalang sang RTF ang approval sang National IATF sa hingyo ni Mayor Treñas may kaangtanan sa travel moratorium.
Sa pihak nga bahin, ginkumpirma sang Philippine Coast Guard (PCG) Iloilo nga nagbalik na ang byahe sang tanan nga mga sakayang pandagat via Iloilo City – Bacolod City kag Iloilo City – Negros Island and vice versa.
Ini matapos nagpagwa sang advisory ang PCG Iloilo kaangot sa temporaryo nga pagsuspende sang mga byahe sang tanan nga mga sakayang pandagat via Iloilo City – Bacolod City and vice versa kasunod sang indi manami nga dalagan sang panahon tuga sang bagyo Dante.
Sa exclusive interview sang Bombo Radyo kay Commander Edison Diaz, pinuno sang PCG Iloilo, iya ginpahayag nga indi man sila makadali-dali sunod sa mando ni Iloilo City Mayor Treñas nga dumilian ang byahe sang mga sakayang dagat via Iloilo City – Bacolod City kag Iloilo City – Negros Island and vice versa samtang pending pa ini for approval sa National IATF.
Suno kay Diaz, nagasunod lamang sila sa pagsulundan sang Regional Inter-Agency Task Force (RIATF) kag Regional Task Force.
Paathag ni Diaz sa publiko, essential traveler man ukon indi, mahimo nga makabyahe via Iloilo City – Bacolod City kag Iloilo City – Negros Island and vice versa samtang indi pa aprubado ang travel moratorium nga ginhingyo ni Mayor Treñas.
