ILOILO CITY- Ginbaha ang pila ka banwa sa probinsya sang Iloilo kadungan sang pagbubo sang mamunog nga ulan dala sang bagyo Dante.
Nahibaluan nga napaidalom sa Signal Number 2 ang Northeastern portion sang Iloilo nga ginalakipan sang banwa sang Batad, Balasan, Carles, kag Estancia.
Sa nangin live report sang Bombo News Team direkta sa Balasan, Iloilo, naglab-ot sa apat ka tapak ang kataason sang tubig baha partikular sa Barangay Balanti-an kag Barangay Poblacion sa diin ginbudlayan ang mga motorista nga makalabay.
Sa interview naman sang Bombo Radyo kay Dr. Jerry Bionat, Provincial Disaster Risk Reduction and Management Officer, iya ginpahayag nga bangod sa pagbaha, kapin 50 ka mga indibidwal ang ginpang-evacuate sa banwa sang Balasan.
May pagtaas man sang tubig sa mga talamnanan sa Concepcion, Batad, kag San Dionisio.
Wala naman sang narecord nga landslide sa mga banwa nga prone sa pagtiphag sang duta partikular na sa Central Iloilo.
Sa banwa sang Batad, nag-awas sa taytay ang tubig sa suba sa Brgy. Salong kag may nagsupon nga kahoy rason nga ginkinahanglan ang pagpatigayon sang clearing operation sa lugar.
Sa interview sang Bombo Radyo kay Mayor Elvira Alarcon, iya ginpahayag nga wala man sang pumuluyo nga gin-evacuate bangud sa mga pagbaha.
