Ipatuman liwat sang syudad sang Iloilo ang pagrequire sang quarantine pass sa mga byahero sa diin isa lamang ka myembro sang pamilya ang hatagan sini.
Ini ang kasunod sang padayon nga pagsurge ukon pagtimbuok sang mga kaso sang COVID-19 sa syudad.
Sa interview sang Bombo Radyo kay Iloilo City Mayor Jerry Treรฑas, iya ginpahayag nga ang quarantine pass ang mahimo nga makuha sa punong barangay sang kada lugar sa syudad.
Sa tion nga mapatuman na ang pagrequire sang quarantine pass agud makabyahe, ini ang magalawig tubtob Hunyo 15 samtang napaidalom ang syudad sang Iloilo sa Modified Enhanced Community Quarantine (MECQ) status.
Suno kay Mayor Treรฑas, kun duha ka myembro sang pamilya ang may yara sang essential nga trabaho, kinahanglan ipakita lamang ang company identification card (ID) sa mga checkpoints.
May kaangtanan naman sa ginhingyo ni Mayor Treรฑas nga travel moratorium ukon temporaryo nga pagdumili sang tanan nga byahe sang mga sakayang pandagat via Iloilo City – Bacolod City and vice versa, pending for approval man ini sa gihapon sa Inter-Agency Task Force on Emerging Infectious Diseases.
Gin-athag man sang alkalde nga wala siya sang kaakig sa mga taga Negros Island nga nagasulod sa syudad sang Iloilo, kag sa baylo, luyag lang niya nga indi na makalaton ang mga Ilonggo sang COVID-19 sa pagsulod sa Negros kag indi man malatnan ang pumuluyo sang Negros sa tion nga magsulod sa syudad.
