Temporaryo na nga ginkansela sang Archdiocese of Jaro ang tanan nga misa umpisa Hunyo 3 kag magalawig tubtob Hunyo 15.
Ini ang kasunod sang paghinyo ni Iloilo City Mayor Jerry Treรฑas sa tanan nga mga simbahan sa syudad sang Iloilo nga ipaiway ang tanan nga misa kag mass gatherings samtang nakapaidalom sa Modified Enhanced Community Quarantine (MECQ) status ang syudad tubtob sa Hunyo 15.
Sa interview sang Bombo Radyo kay Father Angelo Colada, Director sang Archdiocesan Commission on Social Communications sang Archdiocese of Jaro, iya ginpahayag nga ang tanan nga sahi sang misa ang temporaryo nga i-suspende sa sulod sang duha ka semana magluwas sa misa para sa patay apang limitado lamang para sa immediate nga mga myembro sang pamilya.
Suno kay Colada, sa mga nakaschedule naman nga kasal kadungan sang pagsuspende sang mga misa, nakadepende na sa couple kun dayunon nila ang pagpatigayon sang misa bangud immediate man nga pamilya ang pahanugutan nga makatambong.
Suno kay Colada, gina-abisuhan man ang tanan nga mga pari nga ginarequest nga magbadlis sa mga may balatian nga magsuksok sang Personal protective equipment (PPE), facemask kag face shield.
Ginpahayag ni Colada nga pasudlon man sang mga simbahan ang mga tawo nga luyag lamang magpangadi apang nagakadapat may yara sang quarantine pass santo sa pagsulundan sang syudad sang Iloilo.
Nagpangabay man ang natungdan sa publiko nga maghalong, pakamaayuhon nga magsimba via online kag indi anay magwa sa mga balay agud malikawan nga malatnan sang COVID-19.
