Na-intercept sang Criminal Investigation and Detection Group (CIDG) kag Sta. Barbara Municipal Police Station ang wing van nga may kapin 500 nga karton sang makahalubog nga ilimnon sa Barangay Cabugao Norte, Sta. Barbara, Iloilo.
Ang mga arestado amo sanday Jay Cober, driver sang wing van , Ryan Peter Salarda, 21, kag Ronel Conahap, 21.
Sa interview sang Bombo Radyo kay Police Lt. Col. Gervacio Balmaceda, Head sang CIDG Region 6, iya ginpahayag nga halin sa syudad sang Iloilo ang salakyan sa diin ginkuha ang mga ilimnon kag dal-on kuntani sa Lambunao, Iloilo.
Suno kay Balmaceda, natigayon nila nga madakpan ang pagpalusot sang makahulubg nga ilimnon bangud may mga informant man sila kag ginpasangkad pa nila ang pagtipon sang mga impormasyon.
Katungdanan sang CIDG pahayag niya nga buligan ang Local Government Unit (LGU) amo man ang mga pulis ilabi na sa tunga sang pandemya.
Dugang pa sang natungdan, sa tion nga malapta na sa mga tyangge ang mga makahulubog nga ilimnon, diri kag ma-umpisa sa pagbakal sang mga tawo kag mag inom-inom sa diin isa lang ka baso ang gina bulos-bulos gamit nga mahimo mangin rason sang paglapta sang virus.
Nahibaluan nga santo sa executive order nga ginpapanaog ni Iloilo Governor Arthur Defensor Jr., ginadumilian ang pagbakal, pagbaligya, pag-inom, kag pagbyahe sang makahulubog nga ilimnon sa probinsya sang Iloilo.
