Kooperasyon kag pag-ugyon.
Ini ang hugot nga ginahingyo sang Iloilo Provincial Government kadungan sang una nga adlaw nga pagpatuman sang istrikto nga border control sa diin indi pagpahanugutan ang non-essential ukon indi importante nga mga byahe sa mga banwa kag sa syudad sa probinsya sang Iloilo.
Sa interview sang Bombo Radyo kay Iloilo Governor Arthur Defensor Jr., iya ginpahayag nga nangin handa kag organisado ang pagplastar sang tanan nga katapo sang Philippine National Police sa mga checkpoint nga ginpahamtang sa kada border sang probinsya sang Iloilo.
Suno kay Defensor, may yara man sang ginapatuman nga barangay monitoring control sa diin may mga checkpoint man nga ginapatigayon ang mga barangay official kag mga barangay tanod sa ila mga pumuluyo.
Ginpahayag ni Defensor nga katuyuan sini nga mapunggan ukon malikawan ang posiblidad sang paglatnanay sa COVID-19.
Dugang sang gobernador, naintindihan niya nga indi ini mahapos kag tuman kadako ang adjustment nga ubrahon sang tanan apang nagapangabay siya sa publiko nga magsunod agud mapunggan ang pagsurge sang kaso sang COVID-19 kag malikawan ang pagpataas sang quarantine classification sa probinsya sang Iloilo.
Samtang, yari ang nasaad sa Executive Order 175 nga ginpapanaog ni Governor Defensor:
Sa mga makuha sang Government Travel Pass:
- mahimo ini makuha sa Local Chief Executive ukon sa duly authorized representative.
-Para sa iban nga government offices, ang head sang ahensya ukon ang duly authorized representative sa banwa ukon syudad ang maka-issue man sang travel pass.
Sa mga makuha naman sang Company/Employer Travel Pass, ini ang i-issue sang duly authorized officer.
Samtang sa mga empleyado naman sang probinsya nga nagatrabaho sa syudad sang Iloilo, mahimo makuha ang travel pass sa kompaniya ukon employer.
Indi naman required ang Travel pass kun may yara sang medical emergencies.
-Humalin Hunyo 4 tubtob Hunyo 18, 2021, ang mga Returning Residents sang probinsya, Authorized Persons Outside Residence (APOR) kag Overseas Filipino Workers (OFWs) lamang ang pahanugutan nga makabyahe sa probinsya sang Iloilo.
-Ang mga returning residents ang gina-require nga magdala sang government identification card (ID) bilang pamatuod nga residente sang probinsya.
-Ang mga APOR ang gina-require man sang ID kag travel order ukon travel itenerary samtang ang mga APOR nga nagatrabaho sa iban nga livelihood sector ang dapat may ipakita nga ID kag proof of work/business/livelihood kaangay sang business permit, title to property kag iban pa.
-Ang mga drivers sang public utility vehicles (PUVs) ang indi na kinahanglan pa sang travel pass.
-Kinahanglan man ang local government unit (LGU) travel pass kun magbakal sang bulong ukon ano man nga essential goods kun indi ini available sa banwa ukon syudad magluwas lang kun emergency travel.
-Gina-require man ang special Company/Employer Travel Pass sa mga APOR nga nagatrabaho sa mga establisimento nga nagabukas kun Sabado, Domingo kag Non-working days.
-Samtang ang mga may transaksyon naman sa mga banko, insurance companies ukon magabayad sang bills kag ano man nga essential private business transactions, ang nagakadapat magsecure sang LGU Travel pass para sa essential government/business transactions.
