ILOILO – Indi paghalugan sang mga pulis ang pagsulundan sa mga checkpoints sa bilog nga probinsya sang Iloilo samtang wala pa natapos ang Hunyo 18.
Sa Executive Order No.175 nga ginpagwa ni Iloilo Governor Arthur Defensor, Jr., halin Hunyo 4 tubtob Hunyo 18 ang pagdumili sa non-essential nga mga byahe sa kada banwa kag syudad sa probinsya kag amo man ang pag-require sang travel pass sa mga tawo nga ginapahanugutan nga makaagi sa control points.
Sa interview sang Bombo Radyo kay Pol. Col. Gilbert Gorero, director sang Iloilo Police Provincial Office (IPPO), iya ginpahayag nga kun ano ang nangin requirements kag proseso sang pag-check sa una nga adlaw, amo man sini ang mangin sitwasyon sa masunod pa gid nga mga inadlaw.
“What we have started will be the same until the end. Mangin wala kapuslanan ang aton pagpangabudlay sa tunga sang karsada kun i-defeat man lang naton ang purpose which is to prevent the movement of people,” pahayag ni Gorero. Dugang niya, wala ginapabudlayan ang tawo kundi ginalikawan lang ang local transmission sang COVID-19.
Suno pa kay Gorero, gin-abisuhan niya ang mga deployed personnel sa border control points nga palawigon gid ang pasensya kag pahangpon sang maayo ang mga tawo bangud indi gid malikawan nga madamo sa mga byahero ang nagareklamo.
Magluwas nga nagapugok ang trapiko bangud sa maid-id nga inspeksyon, may mga tawo pa suno kay Gorero nga nagatuyo gid nga maglusot bisan wala sang travel pass.
Sa una nga adlaw sang hugot nga implementasyon sang checkpoints, ‘madinalag-on’ ang nangin assessment ni Gorero kag mismo si Governor Defensor suno sa iya ang nagpalab-ot sang pag-abi-abi sa pagbantay sang mga pulis.
Ginpasalamatan man sang IPPO director ang mga barangay tanod nga nagbulig bantay sa mga border ilabi na gid nga may mga banwa malapit sa Iloilo City nga masobra lima ka border control points ang kinahanglan bantayan. #
