Patay ang driver sang motorsiklo kag pilason ang backrider matapos nga nakabunggo sa Sports Utility Vehicle (SUV) sa Barangay Sarapan, Passi City.
Ang driver sang motorsiklo amo si Eddie Navigar, 24, residente sang nasambit nga barangay.
Ang back rider amo si James Palmes, 16, residente sang Barangay Bacuranan, Passi City.
Samtang ang driver sang Hyundai Tucson amo si Jason Pierre Laruscain, 37, residente sang Barangay Buri, Lambunao, Iloilo.
Sa interview sang Bombo Radyo kay Police Lt.Col. Dennis Pamonag, hepe sang Passi City Police Station, iya ginpahayag nga nagasundanay ang mototrsiklo kag ang SUV.
Nag-overtake ang motorsiklo kag nag u-turn ang SUV rason nga nagbunggo-anay ang mga ini.
Suno kay Pamonag, wala nakit-an sang driver sang SUV ang nagasunod nga motorsiklo kag nag u-turn ini pabalik kuntani sa syudad sang Passi.
Gindala sa ospital ang mga biktima apang gindeklara nga dead on arrival ang driver sang motorsiklo kag nakaagom sang bali sa tu-o nga tiil ang backrider.
Wala naman nasamaran ang driver sang SUV.
Sa subong, yara sa kustodiya sang Passi City Police Station ang driver sang SUV kag pagapasakaan sang kaso nga homicide kag physical injury.
