Nakalockdown ang bug-os nga Barangay Poblacion sa San Dionisio, Iloilo umpisa Hunyo 5 tubtob Hunyo 10.
Ini matapos nagsaka sa 19 ang local transmission sang COVID-19 sa nasambit nga barangay.
Sa interview sang Bombo Radyo kay San Dionisio, Iloilo Mayor Darwin Bajada, iya ginpahayag nga sa 19 ka kaso nga narekord sa amo nga barangay, lunsay asymptomatic ang mga ini.
Suno kay Bajada, puno naman ang tanan nga quarantine facility sa ila banwa.
Bangud sini, ginagamit na ang evacuation center kag day care center sang barangay Poblacion agud gamiton bilang dugang nga quarantine facility sang mga COVID-19 positive.
Nagapanawagan naman ang alkalde sa tanan niya nga pumuluyo nga magkooperar kag magsunod sa tanan nga minimum health protocols.
