Posible nga mag untat ang pagbyahe sang Public Utility Jeepneys (PUJs) sa syudad sang Iloilo.
Sa interview sang Bombo Radyo kay Iloilo City Loop Alliance of Jeepney Operators and Drivers Association (ICLAJODA) President Raymundo ‘Boyet’ Parcon, iya ginpahayag nga tuman ka apektado ang tanan nga driver sang pampubliko nga jeepney sang modified enhanced community quarantine (MECQ) status sang syudad.
Ini bangud halos wala na sang pasahero sa syudad sang Iloilo kasunod sang istrikto nga mga pagsulundan sa syudad kag pagsirado sang non-essential establishments.
Suno kay Parcon, sa bahin sang Mohon, Arevalo, Iloilo City 10 percent lang ang nagabyahe nga mga driver sang jeepney, kag amo man sa pila ka distrito sang syudad.
Ginpahayag ni Parcon nga bangud man sa programa nga Libre Sakay sang Land Transportation Franchising and Regulatory Board (LTFRB), halos wala na bilin nga pasahero ang mga traditional jeepney.
Bangud sini suno sa natungdan, kun mapalawig pa ang MECQ kag hugot nga mga pagsulundan, dako ang posibilidad nga mauntat na lamang sa pagbyahe ang mga driver sang jeep bangud wala man sila sang kita.
Panawagan ni Parcon sa Iloilo City Government, hatagan man kuntani sang nagakaigo nga suporta kag bulig ang sektor sang mga driver sang tradisyunal nga mga jeep sa syudad sang Iloilo.
Matandaan nga una na nagsulat ang ICLAJODA sa pamunuan sang LTFRB agud ipalab-ot ang pagpamalabag sa Libre Sakay Program.
